انفلونزا الدروس الخصوصية تضرب البلاد

صرح السيد " كادر معلم " انه هيعلم بالقلم الأحمر على كل مدرس بيدي دروس خصوصية وانه هيضرب على مافيا الدروس بمسطرة حرف تي ، وان التاريخ هيتسطر في عهده وهيتكتب على ورق شفاف وهيعمل منه ملخصات وبرشام يباع في مكتبات الوزارة بالسعر المدعم وكمان هياخد شنطته فيها كراسته وألوانه وهيحضر حصة الرسم مع اخواته المسئولين لرسم خطة طموحة للقضاء على الدروس الخصوصية وحصة الرسم هتكون في منزل الأستاذ " سيد بالته " أستاذ الرسم والتلوين بمدرسة " ارسم عليا " في خمسة شارع النقاشين بمدينة بوهية شطانوف الجديدة ومدة الحصة عشرين دقيقة بتوقيت القاهرة وساعة ونصف بتوقيت أم ضرمان والمادة مادة نجاح وسقوط وعليها خمسين درجة وابقى هات حاجة خد فيها .

ومن المؤكد إن الحصة اياها ستنتهي عقب ضرب الجرس دون اكمال الرسمة والعيال أمامهم أكثر من اختيار

1- أما يروحوا الكانتين يضربوا ساندويتشات حلاوة بالقشطة .

2- أو يهربوا من على سورالجنينة بتاعت فيلا الأستاذ سيد بالتة .

3- أويسقطوا في الإمتحان وهذا هو الإختيار الإستراتيجي لأنهم دايما بينسوا يكتبوا أسمائهم على ورقة الإجابة أو تقدر تقول مابيعرفوش يكتبوا لأنهم شوية حفيظة مش فاهمين حاجة خالص ودايما بيسرحوا في الحصص ودماغهم فاضية زي فصول المدارس وأبيض من ورق البفرة .

ومن المقرر أن يذهب السيد المسئول الى صالة حديد " جيم يعني " عشان يرفع من مستوى التعليم عشرين كيلوا ادعوا له يا جماعة ربنا يعينه ويقويه ويقدره على رفع مستوى التعليم لفوق لفوق لفوق لفووووووووووووووووووق .

فاصل ونكمل الحصة

جائنا الأن البيان التالي أعلنت وزارة " اتعلم بعيد عني " أن أنفلونزا الدروس الخصوصية أصبحت وباء من الدرجة الأولى مع مرتبة الشرف ويجتاح البلاد بسرعة 500 جنيه في الحصة الواحدة ، وأن الوزارة مشكورة مأجورة قررت اتباع المبدأ القائل " ان جالك الطوفان حط ابنك تحت رجليك "وقررت الوزارة حرصا على مستقبل أبنائها من الطلبة والطالبات اغلاق جميع المدارس والإعتماد على الدروس الخصوصية وقررت اصدار تسعيرة موحدة للدروس وكل مدرس معاه عداد زي التاكسيات بالضبط والمدرس اللي هيتقفش حاطت فوطة ع العداد ياويله ويا سواد ليله وطبعا البركة فيكوا كأولياء أمور تكلمونا على طول على خطوطنا المشغولة وفي حالة مخالفة المدرس البنديرة أقصد التسعيرة تتسحب منه الشنطة وياخد قلم أحمر ويروح على ولي أمره بجواب رفد ، وبكده الوزارة تبقى والحمد لله وطنت الدروس الخصوصية وشملتها بالرعاية زيها زي انفلونزا الطيور بالضبط .

ولكن سيظل المتهم بجريمة الدروس الخصوصية هو المدرس ولا انتوا شايفين ايه

واحنا كجمهورية حريصة على المدرسة العامة انفردنا بأحد أعضاء مافيا الدروس الخصوصية وهو الأستاذ " سالب تربيع " خدناه على جنب في الطرقة وكان لينا معاه هذا الحوار .

فسحة ونرجع تاني ..

معانا النهاردة ومعاكوا الأستاذ " سالب تربيع " استاذ الحساب والألعاب بمدرسة اللوغاريتمات الحديثة بمحافظة التفاضل والراجل مشكور مأجور وافق يظهر معانا بعد ما دفعنا له ثمن الحصة أقصد الحلقة مقدم

أستاذ سالب رأيك ايه في نظام التعليم ؟

نظام التعليم هو نظام متميز للغاية بعيداعن المدارس بقى ووجع الدماغ والتلميذ لازم يفتح مخه وولي الأمر يشحت من أجل نجاح أبناؤه وياريتهم بينجحوا عيال سيس جابت الفقر لأهاليها وللبلد

أستاذ سالب انت وأصدقائك من المدرسين أعضاء مافيا الدروس عملتوا ثروات وبقى عندكوا عزب وأطيان وأرصدة في البنوك هل كل مدرس ممكن يبقى زي حضرتك ؟

أولا قل أعوذ برب الفلق يا سيدي ويا مبجل مش كل المدرسين زيي الموضوع حداقة مش علام لأن أنا مش متعين أصلا حكومة ولا حتى قطاع خاص وكان لازم أفتح مخي حبتين وكنت محظوظ وقيراط حظ ولا فدانين شطارة مش كده ولا ايه .

تفتكر ولي الأمر يعمل ايه في زمانا ده ؟

يحسن دخله ياسيدي يشحت أنت هتشيلني الهم ليه هو أنا الحكومة النجاح مش بالساهل ومش هوه اللي دخّل عياله مدارس ما كان علمهم صنعة أحسن ، بس ربك مابيسيبش حد ينام من غير عشا ورزق الهبل ع المجانين واحنا يعني ناكل عيالنا ما أنا كمان بجيب مدرس خصوصي لعيالي حاجة عجيبة والله .

في النهاية بصراحة يا جماعة الموضوع صعب حبتين ولا امتحانات الثانوية العامة وانا باعتباري كصاحب جمهورية على قد حاله ما اعتقدش ان أنا هنعرف أحل المشكلة زي ما انتوا شايفين الراجل بيتكلم بثقة وكإنوا مسنود من حد كبير هنعرض عليكوا سؤال الحلقة يمكن نعرف نوصل من اجباتكوا لحل

السؤال هو تفتكر كيف يمكن القضاء على انفلونزا الدروس الخصوصية ؟

1 –نلغي المدارس ونلغي الإمتحانات .

2- نرجع المدارس ونلغي الشهادات .

3- ندعي على اللي كان السبب .

اذا عرفت الحل اكتبه في نموذج الإجابة وماتكتبش اسمك عليه وبله واشرب ميته لأن انا مش عايزه ومش فاضي لسعادتك وبعدين السؤال تقريبا اتسرب بإجابته .

سلام ،،،،

محمد الزمزمي